El PP de L.lena denuncia les ordenances d’asturianu énte Delegación del Gobiernu

Dempués de les declaraciones del conceyal del PP en conceyu de L.lena Victorino Fernández nes qu'acusó a los conceyales IX, PSOE y URAS d'inspirase na banda terrorista ETA pa redactar les ordenances d'usu del asturianu del conceyu, yera d'esperar que la cosa nun fuere a acabar en paz. La mayoría de los otros trés grupos en conceyu l.lenizu sacó alantre la normativa reguladora del asturianu, pero'l belixerante conceyal popular nun se dio, y elli y el so grupu tan acabante de pidi-y a Delegación del Gobiernu que meta mano nel asuntu.

Ello ye qu'ayeri militantes y simpatizantes d'Izquierda Xunida - Bloque por Asturies en Conceyu de L.lena ficieron una concentración con motivu de la celebración d'un plenu estraordinariu del conceyu. Con una pancarta que dicía "nun somos terroristes, defendemos la nuesa llingua" los cerca de diez manifestantes queríen llamar l'atención del representante popular. Pero teníen más razones pa manifestase. Ello ye que, anque nel orde del día del plenu nun figuraba, ruxíase per L.lena que'l PP podía presentar alegación d'urxencia contra les ordenances acabantes d'aprebar. A la fin nun foi asina, y el plenu trescurrió ensin mayor problema tratando los asuntos que salíen nel orde del día, incluyendo la renuncia del conceyal de la URAS a siguir en cargu, l'alquisición d'acciones de Sogepsa y un pleitu sobre los praos del Monte Aramo.

Pero la sorpresa esperaba n'acabando'l plenu. Esta mañana súpose que'l PP de L.lena pidió a la Delegación del Gobiernu qu'actue d'oficiu na impugnación del Reglamentu d'Usu del Billingüismu. La razón del grupu de Victorino ye que'l reglamentu pon al asturianu nun estatus penriba del castellanu. El PP de L.lena va más p'alantre y píde-y tamién a Delegación, institución que yá actuare d'oficiu na impugnación de la oficialidá del asturianu nos conceyos que la declararon, qu'ellabore un informe xurídicu p'apautar la llegalidá del procesu y que faiga una evaluación del costu que va traer l'aplicación de la iniciativa a les arques municipales.

Ver veráse en qué para la cosa, anque'l cambéu de cargos en Delegación del Gobiernu que va venir col cambéu de color políticu n'España pue influyir en que prospere o non la protesta de los populares de L.lena.