"El PP consolida con otru recursu la so aversión hacia l'asturianu", diz Tascón

L'Abogacía del Estáu ta acabante de poner otru recursu contencioso-alministrativu contra'l Plan de Normalización Llingüística de Carreño pese a los informes xurídicos favoratibles al mesmu. La conceya de Cultura, Cecilia Tascón, afirma que con esta maniobra'l Partido Popular (PP) afita "la so aversión hacia l'asturianu".

"El PP de Carreño debería d'aprovechar la so sintonía colos Gobiernos estatales más qu pa 'pleitiar' con ánimu de destruyir, pa facer cosas interesantes y necesaries pal nuesu conceyu. Oxalá ponga'l mesmo enfotu en construyir soluciones col Gobiernu llocal y rexonal pa l'ampliación de les sableres y desarrollu de la segunda fase del paséu marítimiu de Candás. Sería interesante qu'hubiera tanto enfotu pa esto como ta poniendo en valtar esti Plan d'Usu”, afirma Cecilia Tascón.

Nel mes d'abril, gracies al sofitu de la Direición Xeneral de Planificación Llingüística y Normalización, el Conceyu de Carreño dispunxo d'un informe xurídicu firmáu por Nicolás Bartolomé que, al igual qu'otru de los servicios xurídicos municipales, afitaba la llegalidá del Plan de Normalización y dexaba ensin argumentos el de la Direición Xeneral de Coordinación de l'Alministración Periférica del Estáu del Ministeriu de Facienda y Alministraciones Públiques nel que se basaba la Delegación del Gobiernu estatal n'Asturies pa demandar la so anulación. Trés meses depués, ye l'Abogacía del Estáu la que pone un recursu contencioso-alministrativu que se suma al del PP llocal.

Contra la formación popular, la socialista critica tamién la so doble cara por concurrir en Xixón "con un programa eleutoral que proponía actualizar el Plan de Normalización d'esi conceyu y poner en valor el patrimoniu llingüísticu" mientres qu'agora "se dediquen dende la oposición a impugnalo". Tamién defende que les iniciatives previstes nel Plan na mayor parte "nun suponen carga presupuestaria nenguna y pueden executase en collaboración con asociaciones ensin ánimu d'arriquecimientu".

Solicitú al Gobiernu del país pa presentase como codemandáu

Tres conocer el recursu de l'Abogacía del Estáu, la edil d'Educación, Cultura y Bienestar Social señaló que remitió "los recursos interpuestos pol PP llocal y la Delegación del Gobiernu contra'l nuesu Plan de Normalización Lingüística a la conseyería" y afirmó que ta tratando esti tema col direutor xeneral Fernando Padilla. "Solicitarémos al Gobierno del Principáu qu'estudie'l personase nel procedimientu como codemandáu nos dos pleitos pa sofitanos”, anunció.