El PP anda revueltu

La renuncia del ministru de Fomentu Francisco Álvarez Cascos destapó la guerra nel PP asturianu polos puestos de la llista electoral pal 14 de marzu, qu'a la fin va encabezar Alicia Castro Masaveu. La candidatura de la ex-conceyala uvieina y parllamentaria nun dexa contentu a tol partíu. Anteayeri, dos conceyales del PP en Llanes dimitieron, afondando la mancadura qu'abrió esta mesma selmana l'alcalde Cabrales, Antonio Pérez Prieto, que dixo que les ales d'Asturies nun se sentíen representaes na llista y que se sentíen utilizaes "pa pegar cartelos".Nun son los únicos que queden malagustu.

En Xixón, una de les agrupaciones más fuertes, la candidata a l'alcaldía nes últimes municipales, Pilar Fernández pardo, que postulaba pa entrar na candidatura al parllamentu, tuvo que conformase con dir na llista al senáu. Anque la conceyala espresó que taba contenta cola designación al senáu porque "ye la meyor manera de concueyar en dos ámbitos distintos la política municipal" la decisión de Madrid de que Pardo nun entrare a la llista "bona" nun ye precisamente colo que contaben en Xixón. Con cinco diputaos y trés senadores, el PP aspira a repetir resultáu n'Asturies, y el so secretariu xeneral, Ovidio Sánchez, nun escatima esfuerzos pa ello. Esta selmana, Ovidio atacó a la Federación Asturiana d'Empresarios por participar nos alcuerdos de concertación con principáu y sindicatos y llamó a la patronal asturiana a zarrar files cola so opción política, porque nun se pue aplaudir la política d'unos en madrid y la de los otros n'Asturies. El portavoz popular na Xunta Xeneral, Juan Morales, dio otru pasu más nesta argumentación y aprovechó la presentación que fizo'l Conseyeru de Trabayu Graciano Torre del Pactu Social na Xunta Xeneral p'afirmar que'l Pactu social ye una cosa "propia del franquismu" porque "va permitir que los sindicatos seyan los qu'apauten qu'escueles van concertase y au van asitiase los centros de salú"

Contra esta situación, la receta económica del PP pasa pel continuismu: baxada d'impuestos directos y reblagu del consumu. Ver veráse si son a repetir resultáu, anque la non presentación, yá confirmada, de la URAS a estes elecciones pue favorecer enforma les aspiraciones de la llista popular.