El PP afirma que FAC negocia alcuerdos en dellos conceyos “pa que gobierne la izquierda”

Dende’l PP señalen que FAC ta ufriendo alcuerdos al PSOE y IX-LV en conceyos onde los populares foron la llista más votada “pa que gobierne la izquierda”. Gozón, Villaviciosa y Llanera son dalgunos de los conceyos que señalen los populares.
 
Europa Press algamó esta información de fontes del PP descontentes cola posición que ta tomando Francisco Álvarez-Cascos nes negociaciones sobre la presidencia d’Asturies y los conceyos onde esisten pautos posibles. La postura que defiende Foro Asturias Ciudadano (FAC) ye la de negociar por separtao, mentes que’l PP quier un alcuerdu “global” cola intención d’asegurar la gobernabilidá y estabilidá nos conceyos y na Xunta Xeneral.
 
Les fontes populares aseguraron qu’esta intención supuesta de FAC de pautar con formaciones d'izquierda “nun ye nueva”, faciendo referencia a una negociación posible col PSOE d’Uviéu pola alcaldía.