El PP acepta la propuesta del Conceyu Abiertu Pola Oficialidá

Una delegación de representantes de la plataforma abierta Conceyu Abiertu Pola Oficialidá entrevistóse esta mañana na Xunta Xeneral del Principáu con una delegación de diputaos del Grupu Popular na cámara asturiana.

Rodrigo Grossi, Emilio Rodríguez y Emilio Pérez formaron la delegación de diputaos populares que s'entrevistaron esta mañana con Pilar Fernández y Xulio Casado, representantes del Conceyu Abiertu pola Oficialidá que-yos presentaron a los diputaos populares el documentu "Una propuesta de diálogu pa salvar la llingua asturiana" col que'l CAO pretende abrir una mesa de negociaciones colos trés grupos con representación institucional con vistes a que la oficialidá se reconoza na próxima reforma estatutaria.

Los representantes del CAO comunicaron a Asturies.com que detectaron mui bona dimposición nos diputaos populares, que-yos espresaron el posicionamientu creciente al favor del asturianu que se da dientro del so partíu y que se plasmó en cuestiones como l'apotyu al Plan de Normalización del Asturianu, al que'l Gupu Popular presentó "enmiendes constructives". Los diputaos populares aceptaron la propuesta del CAO, al que reconociern como "interlocutor válidu col movimientu de reivindicación llingüística" y comprometiéronse a llevar alantre colo que se propón en documentu, ello ye, abrir un dialogu constructivu y estable col CAO y colos espertos qu'esti designe con vistes a debatir la entrada de la oficialidá nel estatutu. El PP pidió un recesu con motivu de les vacaciones de branu y ofrecióse a apautar una prósima reunión, esta yá de trabayu fecha yá la presentación, pal mes de setiembre.

Esta foi la primer entrevista colos grupos parlamentarios de los reepresentantes del CAO pa dar a conocer el documentu "Una propuesta de diálogu pa salvar la llingua asturiana" Per aciu d'esti documentu, el CAO quier facer mesa conxunta con tolos partíos pa debatir la entrada de la oficialidá na reforma estatutaria, pero ta dimpuestu si fuere preciso a aconceyar por separao con cada grupu parllamentariu si ello ayuda a que'l diálogu avance meyor. En cualquier casu, la intención ye qu'esta mesa aconceye periódicamente y con un calandariu de reuniones pautáu y estable, participando na mesma representantes de los partíos y espertos propuestos pol CAO.