El popular Luis Peláez arrenuncia al so acta de diputáu y muestra’l so apoyu a Francisco Álvarez-Cascos

Luis Peláez ye’l quintu diputáu del Grupu Popular na Xunta Xeneral que dexa’l so cargu. Esti xueves formalizó’l so arrenunciu a l’acta y mostró’l so apoyu a Francisco Álvarez-Cascos, que marchó del PP pa militar en Foro Asturias.
 
D’esta forma, Peláez, diputáu pol PP dende 1999, sigue’l camín d’otros compañeros de partíu como Pelayo Roces, Emilio Rodríguez, Cristina Coto y Marcial Rodríguez, que tamién pasaron a formar parte de Foro Asturias, partíu de creación nueva que participará nes eleiciones de mayu con una candidatura encabezada, con casi total seguridá, por Cascos. Militante del PP dende 1990, esti políticu nacíu en Lluanco ye un inxenieru téunicu que llegó a ocupar el cargu de conseyeru d'Agricultura y Ganadería ente 1995 y 1998.
 
Nuna rueda de prensa, Peláez esplicó que los motivos del so arrenunciu a l’acta de diputáu son la falta de “llibertá y democracia” nel PP d'Asturies. Tamién dixo nun entender la postura de la direición estatal del PP y dexó cayer que n’Asturies el que manda nel partíu ye Gabino de Lorenzo, alcalde d’Uviéu. “Asturies sufre güei una fonda crisis económica y social, pero la so mayor crisis ye la degradación de la so clase política”, afirmó Peláez, qu'acabó diciendo que lo que precisa Asturies ye “un llíder” como Cascos, al que comparó con Manuel Fraga.