El Polisariu denuncia altes cifres de firíos y deteníos

El Frente Polisariu denunció esti vienres que'l desagospiu del campamentu de protesta y los posteriores incidentes que se rexistraron en L’Ayún dexaron decenes de muertos, más de 4.500 firíos y más de 2.000 deteníos.

Nun comunicáu, del Ministeriu de Territorios Ocupaos de l'autoproclamada República Arabe Sah.aragüi Democrática (RASD), el Polisariu asegura amás que L’Ayún "se caltién n'estáu de sitiu" y que les fuerces de seguridá marroquines "siguen atacando les viviendes de los ciudadanos sah.arianos, deteniendo a tol qu'alcuentren, mayando a families enteres y secuestrando a los mozos".
  
Trátase, según el Polisariu, de detenciones abusives y indiscriminaes que van siguíes de "llargues tortures" per parte del Exércitu y les Fuerces Auxiliares. La Policía, pela so parte, "utiliza llistes concretes de persones y viviendes, separando los sos ataques ente mozos de la 'intifada' y defensores sah.arianos de Derechos Humanos", precisa.
  
Coles mesmes, el ministeriu diz tener constancia de más de 2.000 deteníos, pese a qu'almite que "algunos quedaron llibres dempués de que los torturaren brutalmente y, nun estáu críticu busquen refuxu nes sos cases o n'otros llugares".
  
A estos deteníos treslladáronlos al cuartel de la Policía, el cuartel de les Fuerces Auxiliares, la Cárcel Negra de L’Ayún, tres cuarteles del Exércitu, la escuela de secundaria Alal Ben Abdala, dos espacios habilitaos dientro del campu de fútbol y a un cuartel de la playa de L’Ayún, precisa'l Polisariu.
  
4.000 firíos
No referente a los 4.000 firíos, de distinta consideración, munchos d'ellos permanecen escondíos nes sos viviendes pol "terror" que se vive na ciudá, "sin que puea conocese, en tolos casos, la evolución del so estáu", señala'l comunicáu.
  
El Polisariu denuncia'l casu concretu del mozu Ali Salem Lanzari, con una fractura nel pescuezu. La so familia arriesgóse a viaxar a Agadir pola so cuenta pa que lu atendieren nel hospital, onde morrió.
  
Per otra parte, señala que "testigos oculares contaron decenes de muertos repartíos pel entornu del campamentu de Gdeim Izik y na parte este de la ciudá de L’Ayún ", mientres qu'apunta que "los desapaecíos cúntense por decenes, sin saber si tán muertos, firíos, o ente los deteníos".
 
Dificultá pal recuentu
El ministeriu de la RASD almite que "la dificultá pa realizar el recuentu ye enorme, dao qu'existe toque de queda, decretóse l'estáu de sitiu y la represión contra los ciudadanos ye continua".
  
A lo último, informa de qu'en Smara, tamién nel Sáh.ara Occidental, ayeri produxéronse de la mesma manera manifestaciones per parte d'estudiantes en solidaridá colos ciudadanos saharagüis de L’Ayún, a los que la Policía marroquina aventó "con violencia y pa evitar una sublevación mayor decretóse estáu de sitiu, suspendiendo temporalmente les clases hasta'l próximu día 19 de payares".