El POLA pasa a plazu d'alegaciones

El Boletín Oficial del Principáu d'Asturies (BOPA) d'ayeri daba anuncia del entamu del períodu d'información público y alegaciones al alcuerdu de la Comisión d'Urbanismu y Ordenación del Territoriu d'Asturies (CUOTA) que, con fecha del 22 de marzu del 2004, aprebó inicialmente'l Plan Territorial Especial d'Ordenación del Litoral Asturianu (POLA)

El documentu del POLA que llevaba dando vueltes pelos despachos dende l'añu 2.00, ñaz oficialmente col enfotu de caltener y dinamizar la costa, y nel so documentu previu presentábase como "instrumentu de desarrollu sostenible que socialice la costa permitiendo un disfrute públicu ensin degradar el mediu"

El POLA contempla actuaciones nueves sobre playes, creación de caminos pa peatones y paseos, cambeos na rede viaria y creación d'aparcaderos y una zonificación urbanística nueva dafechu. D'otra manera'l POLA inclúi tamién trabayos de recuperación de llugares degradaos, un tratamientu especial pa les llinies d'alta tensión que pasen pela costa, un plan d'ordenación de yacimientos arqueolóxicos y otru pa los campings que tan en llinia costera.

Yá de la que se presentó'l Plan, los ecoloxistes de la Coordinadora Ecoloxista d'Asturies dieron l'alarma. Según el grupu conservacionista, el principal oxetivu del Plan yera'l de xubir la presión humana, y sobremanera la turística, en tola costa. Les idees que s'enxertaben na presentación previa del plan merecíen toes elles crítiques, entamando pola de facer aparcaderos allegaos a les playes. Lo que pa la Conseyería yera la meyor manera pa desaniciar la presencia d'automóviles atiestando cola arena, pa los ecoloxistes yera una manera d'afayar l'accesu de más de 5.000 coches (tantos como places d'aparcaderu) a les playes, que pasaben a enxertase bien d'elles en "Parques-Playa" una categoría nueva que recibía tamién la crítica verde. Nesti casu, lo que yera pa l'alministración una manera d'amestar "usos tradicionales con usos d'ociu y espardimientu" yera pa los otros una propuesta p'atacar de turistes un total de más del 10% de les playes asturianes, delles hasta agora virxes y que tendríen qu'aguantar una presión humana cada vegada mayor.

La construcción de xales y viviendes arreyaes a estos nuevos parques-playa apaecía polo tanto como ún posible efectu secundariu de la masificación turística. Nesti sentíu, el POLA reconocía esta xuba de la presión urbanística y dicía que se tentaría facer un diseñu urbanísticu amañosu que concentrare les construcciones nueves en llugares yá edificaos y mirando que'l volume a edificar tuviere'l menos impactu visual posible.

Lloñe d'una llectura conservacionista del espaciu, la revista Inmoley, nel so analís del POLA vía una puerte abierta a incrementos d'edificabilidá, en cuantes que'l POLA diba permitir a los conceyos camudar la calificación de núcleos rurales a la categoría d'asentamientos de baxa densidá, categoría qu'autoriza a la construcción de cases separtaes y viviendes unifamiliares.

Xunta too esto, el Viceconseyeru d'Infraestructures y Ordenación del Territoriu, Francisco González Buendía, dio anuncia de laque la CUOTA aprebó'l plan, d'otra de les acciones que diba afalar el POLA dientro d'ún de los sos oxetivos principles: l'aprovechamientu deportivu de la costa asturiana. Pa ello, a parte de poner amarraderos pa barcos de recréu en tolos llugares en que se pueda, el POLA va afalar en primer llinia de costa la construcción de campos de golf, un deporte que, según Buendía yá nun yera elitista y que concueya perfectamente col oxetivu de protexer el mediu ambiente.

El documentu del POLA, al que puen presentáse alegaciones nel plazu d'un mes, ta disponible nel Serviciu de Xestión y Disciplina Urbanística y nes Oficines Urbanístiques Territoriales d'A Veiga, Bual, Pravia, Nava y Colombres, tamién ta na rede.