El plenu de Xixón refuga los despidos d’El Comercio

El plenu del Conceyu de Xixón aprobó’l por unanimidá una resolución contra’l treslláu de la rotativa d’El Comercio a Benavente y los despidos. Amás, trabayadores declaren que la recolocación tien l’oxetivu de sanear les cuentes del diariu ABC.

“Julio Maese Guisáosla y don Goyo Ezama, el director xeneral y el director financieru d’El Comercio queríen despidir ensin armar follón a 29 trabayadores d’una empresa con 600.000 euros de beneficiu”, entama’l comunicáu de los trabayadores d’El Comercio, pero según ellos, “el fin de selmana resultó-yos tirante”.

El vienres 12 el plenu del Conceyu de Xixón aprobó por unanimidá colos votos de PSOE, PP y IX una resolución na que refugaben los despidos y el treslláu de la rotativa del periódicu a Benavente (Zamora). Sobre esto, los trabayadores critiquen qu’en la retresmisión del plenu de Canal 10, televisión que comparte grupu empresarial con El Comercio, “marchó la señal nel momentu na que na Casa’l Conceyu diba falase del decanu de la prensa asturiana”.

Especulación y saneamientu d’ABC
“Prometieron nel so día al Conceyu’l treslláu íntegru del periódicu a un polígonu industrial xixonés a cambiu de la recalificación de los terrenos y agora planeen un granible pelotazu urbanísticu”, diz el comunicáu del los trabayadores sobre les intenciones del periódicu tres de los despidos.

Amás, el colectivu denuncia que los beneficios económicos que “que saca de los asturianos mándalos a Madrid pa pagar la deuda del diariu ABC”. El diariu conservador madrilanu pertenez al Grupo Vocento, empresa propietaria d’El Comercio y Canal 10, ente otros.

Firmes d’apoyu
Esti conflictu llaboral ta teniendo destacaos apoyos a los trabayadores na ciudá de Xixón. Amás del sofitu del Conceyu, la Federación d’Asociaciones de Vecinos de Gijón/Xixón y los Kioskeros Asociados de Asturias trasmitieron la so solidaridá. Anguaño’l colectivu de trabayadores alcuéntrase recoyiendo firmes d’apoyu.