El plazu pa participar nel concursu Manuel Nevado Madrid de microrrellatos mineros fina'l día 21

|
Cartelu del XVII Concursu de Microrrellatos Mineros Manuel Nevado Madrid

Esti añu cumpliéronse 30 años de la muerte del líder mineru antifranquista al qu'esti certame lliterariu únicu pola so temática homenaxa tolos años dende'l 2004.

Cualquier persona de cualquier nacionalidá pue participar nel XVII Concursu de Microrrellatos Mineros Manuel Nevado Madrid, de la Fundación Juan Muñiz Zapico de Comisiones Obreres (CC OO) d'Asturies, que tien numberosos participantes del tol Estáu, Llatinoamérica y dellos puntos d'Europa. Pa ello ha de presentar testos n'asturianu o castellanu –un máximu de dos– con "motivos temáticos, personaxes, argumentos o ambientaciones venceyaes col mundu de la minería", con una estensión que nun ha d'esceder les 40 llinies en lletra de cuerpu 12 y tipu Times New Roman o similar, pudiendo ocupar un máximu d'una fueya en formatu folio o DIN-A4 por dambes cares.

El plazu d'almisión d'orixinales fina'l miércoles 21 de octubre. Los microrrellatos han d'unviase, xunto con una plica, per vía postal a la Fundación Juan Muñiz Zapico, con estes señes: Santa Teresa númberu 15, 33005 Uviéu (Asturies).

El fallu del xuráu, presidíu pol caderalgu Benigno Delmiro Coto, va facese públicu, como ye tradición, el 4 d'avientu, festividá de Santa Bárbola. El ganador va llevar 300 euros, un llote de llibros y un grabáu de Manuel Calvo, mentes que va haber áccesits de 150 euros, más llibros, al meyor testimoniu históricu y a menores de 18 años.

Denis Soria llevó esti gallardón l'añu pasáu con 'Caliente', un testu n'asturianu. Nesa edición entregóse un áccesit n'asturianu a Roberto Xosé Fernández por 'Avientu-18', y hebo una mención al microrrellatu 'Hai de tener memoria' de Secundino Díaz Menéndez.

 

Contador Estadistiques