El planeta funde

El fenómenu de recalentamientu del Planeta Tierra avanza más apriesa de lo que se creía. Les previsiones dela estaya de mediu ambiente de la ONU que daben pa esti sieglu una xuba d'ente 7-15 centímetros del nivel del mar, queden curties énte un estudiu recién publicáu por científicos de la Universidá d'Alaska que ponen la marca de la "mareona" nun metru de xuba. L'estudiu fízose poniendo mediciones en 67 glaciares d'Alaska durante un periodu de cuarenta años, y conclúi que lleven fundiendo ensin aparar dende los años 50, pero que de los 90 faenlo al doble de velocidá. Sólo col xelu que funde n'Alaska da pa que la mar xuba un milímetru y mediu al añu, colo que, estrapolando al restu del mundu, da pa que nun plazu d'un cientu d'años se ponga'l nivel un metru más arriba.La noticia vien a salir a un mes del Conceyu Internacional sobre desarrollu sostenible de Johannesburgo y xusto cuando'l Senáu de Francia ta acabante d'espublizar un completísimu informe sobre los efectos del cambéu climáticu con predicciones semeyes a les de los científicos americanos. L'estudiu francés, que pue consultase enteru na rede y ta espublizáu nun doble cd-rom, analiza la evolución del efectu invernaderu y los factores que lu provoquen, lo mesmo naturales qu'humanos, pero desarrollando muncho estos últimos, como los aportes contaminantes del tresporte y de l'actividá industrial.