El plan de Normalización acuta’l 66% del so presupuestu pa la educación

La Conseyera de Cultura Ana Rosa Migoya, el director de Promoción Cultural Carlos Madera y el responsable de la Oficina de Política Llingüística Ramón d'Andrés preesentaron esta mañana na sé de la Conseyería de Cultura los conteníos y presupuestos del Plan de Normalización del asturianu, del qu'Asturies.com yá adelantare'l so testu d'oxetivos políticos el pasáu día 18.

Conocíes yá les 68 midíes polítiques que s'apautaben nel plan y el total de la so financiación, que raspia los 25,5 millones d'euros, la mayor dulda taba en saber el repartu d'esi presupuestu ente los seis bloques temáticos en que s'articula'l plan. La dulda yá ta despeyada y según la información oficial que s'apurrió esta mañana, un 66% del presupuestu del plan, aprosimadamente 16,5 millones d'euros, van dir pa la estaya d'educación. La segunda partida presupuestaria más grande va dir p'actuaciones nel ámbitu institucional, anque esta estaya va tener una financiación decreciente a lo llargo de los trés años de duración del plan. La producción cultural y l'apoyu al asturianu nos medios de comunicación van contar respectivamente col 6% de la dotación del plan, mientres que la recuperación de la toponimia tien acutáu el 7% del presupuestu, mientres que les campañes de promoción social van contar col 2%.

Nel actu de presentación oficial del Plan, Ramón d'Andrés sorrayó que se trata d'un "avance innegable que un escluye avances futuros" y defendió'l so valir como "ferramienta útil que fai inesplicables les crítiques negatives, inoperantes y incluso frivolizantes que pretenden quitá-y validez".

Más dura contra les crítiques al plan y respecialmente cola posición de l'Academia de la Llingua Asturiana foi la Conseyera de Cultura. Ana Rosa Migoya, qu'esplicó que se trata de "un bon plan que respuende a una voluntá política" sorrayó'l valir del plan como una ferramienta que nun escosa la llei d'usu del 98 y que dexa'l camín abiertu a futures actuaciones que la desarrollen. A entrugues de los periodistes presentes nel actu, la titular de cultura sorrayó que toles midíes que contempla'l plan pal asturianu van aplicase de manera equivalente col gallego-asturianu y faló de la esistencia d'una "colonización innegable por parte del gallegu en delles partes del occidente asturianu".

Respective a les crítiques al plan, y en concreto sobre les que ficiere l'Academia de la Llingua, Migoya dixo que "L'ALLA tien un nivel mui altu d'esixencia que s'asitia mui penriba de lo que se comprometió en Pautu de Gobiernu" y pidió-y a l'Academia, a la que-y reconoció'l valir del so trabayu científicu "qu'abandone los masimalismos" y fizo referencia al abandonu voluntariu por parte de l'ALLA de la Xunta de Toponimia, órganu al qu'asitió como referencia cimera en cuestiones de toponimia. Dempués de recordar que "Ramón d'Andrés tien tol sofitu de la Conseyería y entendemos que munches vegaes trabaya baxo presiones de tou tipu" la responsable de Cultura adelantó que los primeros espedientes toponímicos van llevase a Conseyu de Gobiernu nes prósimes selmanes. Sobre la quexa de "Amigos de los bables"que la selmana pasada pidieren que se pasare'l conteníu del Plan de Normalización a trámite d'información pública, Migoya foi clara al esplicar que los planes de gobiernu nun precisen de pasar per esi procesu y que polo tanto, la demanda taba fuera de llugar.