El PKK anuncia’l fin d’altu’l fueu unillateral declaráu nel mes d’agostu

El Partíu de los Trabayadores del Curdistán (PKK) va volver a garrar les armes tres seis meses de tregua. La guerrilla curda anuncia una “defensa activa” y señala que nun va atacar oxetivos turcos.
 
La razón principal pa esta vuelta a la llucha armada ta na continuidá de les operaciones militares del exércitu turcu contra la guerrilla, con más de 40 muertos según fuentes del PKK, y la detención de más de 800 políticos curdos, a los que se-yos niega defendese na so llingua materna. Tamién hubo otres reclamaciones que’l Gobiernu d’Ankara negóse a tratar, como l’ainiciu de les negociaciones col líder históricu del partíu, Abdullah Öcala, condenáu a cadena perpetua polos delitos de terrorismu y separatismu.
 
Nel comunicáu del fin de la tregua, publicáu nuna páxina web averada al PKK y recoyíu pola axencia de noticies turca Firat, el grupu insurxente curdu matizó que nun va atacar oxetivos turcos, pero que sí va adoptar una postura defensiva más “efectiva”. “El periodu d'inactividá qu'implementemos pa favorecer una resolución democrática yá perdió la so validez”, esplica'l partíu.
 
El PKK declaró la tregua unillateral n'agostu, al envís de caltenela hasta les eleiciones xenerales turques, previstes pal 12 de xunu, pa dar un marxe al Gobiernu pa “resolver el conflicto”. El partíu, d’ideoloxía socialista, entamó la llucha armada en 1984 pa reclamar los derechos de la minoría curda que vive nel sureste de Turquía.