El pieslle de la hostelería y de les actividaes non esenciales amplíase hasta'l 3 d'avientu

|
Monitor de Barbón xunta telemática Comité de Crisis COVID-19

La prórroga de la resolución dexa abierta la revisión de la situación del pequeñu comerciu, que'l Gobiernu va tratar el llunes.

Hasta'l 3 d'avientu van siguir ensin actividá la hostelería y el restu d'actividaes económiques consideraes non esenciales, incluyida la cultura. Son 15 díes más al considerar que "la situación epidemiolóxica dende'l 2 de payares siguió empeorando con un incrementu importante tanto nel númberu de casos total, como nes incidencies acumulaes a 7 y 14 díes. Esto también se produxo na población mayor de 65 años, anque paez que nesti grupu d'edá podría ser un incrementu non tan acusáu", rellata la resolución roblada ayeri por Pablo Ignacio Fernández Muñiz.

Esta mañana, el conseyeru de Salú actualizó les cifres de la incidencia del país, de 648 a 14 díes, cuando la media estatal ye de 452. Mentes, a 7 asítiase en 339, tamién superior a la media, de 182.

Aconceyamientu del Comité de Crisis

"En particular, les midíes qu'afeuten al comerciu minorista podrán modificase o dexase ensin efeuto, en función de la situación epidemiolóxica, nun plazu non superior a siete díes", establez tamién la resolución que prorroga la del 3 de payares qu'entró a valir el miércoles 4. El llunes va tomase la decisión nel aconceyamientu convocáu del Comité de Crisis COVID-19 tres revisar los datos d'esta selmana.

Fase 2 modificada

Esta ampliación de les restricciones sumóse a la segunda pórroga de la fase 2 modificada qu'entró a valir el sábadu per 15 díes, hasta'l día 28. Éstes son, principalmente, la prohibición de la celebración d’amagüestos –“actividaees lúdiques serondiegues” reza la resolución–, la imposibilidá pa la hostelería d’emplegar les barres y l’impedimentu de vender alcohol más allá de les 22 hores pa los comercios minoristes o d’usar les duches y vestuarios de los centros deportivos, y el tope de 6 persones non convivientes pa los axuntamientos de persones en llugares públicos o privaos.

Na imaxe, pantalla na que'l presidente Adrián Barbón siguió la xunta telemática del Comité de Crisis COVID-19 del llunes. Semeya obra d'Armando Álvarez.

Contador Estadistiques