El petróleu asiéntase na raya de los 40 dólares

Los inversores tan a la espera d'anuncies ensin cambeos de posiciones. Nin la xuba del petroleu, nin el mercáu de futuros, nin los tipos d'interés asustaron a una bolsa pendiente de les elecciones nos Estaos Xuníos.

Asina les estadístiques macroeconómiques nun afectaron a a la renta variable. Nos Estaos Xuníos el datu de confianza del consumidor de la Universidá de Michigan foi de 95,8 puntos, un puntu perbaxo de lo estimao polos economistes. Nel Vieyu Continente la producción industrial de la Zona Euru del mes de xunetu algamó'l 2,4% cuando los analistes contaben solo col 2%. N'Alemaña los precios de producción d'agostu foron d'un 0,3%, dientro les previsiones.

Wall Street nun tuvo una selmana con munchos blincos, pesllando'l vienres con unes probetayes xubes. Asina, l'índiz Dow Jones medró un 0,39% hasta los 10.284,46 mentanto que'l tecnolóxicu Nasdaq tuvo una xuba del 0,32% hasta los 1.910,09 puntos. Les places europees de Llondres, París y Francfort tamién tuvieron una selmana ensin perimportantes xubes pesllando'l vienres en positivo.

Selmana ensin avances nel Ibex-35 pesllando en tables. L'apatía de los inversores na renta variable ye clara como bien diz el volume de negociu que raspió los 2.400 millones d'euros con mayoría d'operaciones derivaes del mercáu de futuros. L'Ibex-35 asitióse nos 8.085,30 puntos con una probetaya xuba nel conxuntu la selmana del 0,36%. L'anuncia de la selmana foi la renuncia del británicu HBOS d'intentar mercar la nueva ayalga de los Botín: el bancu inglés Abbey National. Esto supón que la banca inglesa nun va frenar los planes d'espardimientu nes isles del SCH y que van preparase pa la batalla comercial que ta a puntu d'entamar. Los valores más beneficiaos poles xubes d'esta selmana pasada son Sogecable, Inditex, Gamesa, Arcelor, Banesto, Telefónica y Repsol. Nel terrén de les perdes el SCH foi'l más castigáu del parqué.

Los furacanes del Caribe punxeron en riesgu les plataformes petrolíferes y refineríes de la zona, y, anque al final nun hebo peligru pal petroleu sí que se rexistraron perimportantes daños materiales y delles perdes humanes. L'últimu furacán, l'Iván El Terrible, sí qu'emburrió a les empreses a pesllar les istalaciones petrolíferes del Golfu de México con unes perdes de 3,9 millones de barriles de producción. El preciu del petroleu entamó una nueva selmana con xubes algamando'l barril Brent los 41,75 dólares (+3%).

L'euru foi perdiendo posiciones a lo llargo de la selmana quedando col dólar en 1,217 unidaes. Al otru llau del Atlánticu los inversores tan pendientes de la xunta que tien la Reserva Federal onde toos apunten a una xuba de cuartu de puntu nos tipos d'interés. Nel mercáu de renta fixo hai diferiencies ente Europa y Estaos Xuníos, peor la continental y meyor la d'ultramar