El perrucuspín Caricote protagoniza una historia de Menéndez Fernández

'Caricote' ye l'álbum infantil últimu de Carla Menéndez Fernández. El nuesu amigu ye un perrucuspín al que nun-y presta nada vivir, xugar o mesmo xintar en compañía, hasta qu'un día se pincha con un escayu y cambia la so forma de ver les coses.

Nesi momentu Caricote entama barruntar que l’aislamientu nun ye tan bono y qu’igual la compañía nun ta de más, inclusive pa facer arrollones peles cuestes del pueblu. ¡Qué bona decisión!

Trabe edita esta historia nueva de Menéndez Fenández, autora d'otros llibros infantiles como 'Mansín', 'Isidru', 'Fina la parrochina' y 'Xovellanos, un paisanu melgueru'. 'Caricote' forma parte de la coleición 'Vivir del cuentu', idea orixinal de la propia escritora, que se centra en personaxes mui bien averaos a la cultura asturiana, cuando d’anguaño, cuando del pasáu, cuando seres humanos, cuando animales emblemáticos de la tierra astur.

Estos llibros son mui atractivos pa trabayar na aula cola reciella más nueva, tán ilustraos a color y encuardernaos a tapa.