El PAS ve una burlla nel “plan de Normalización”

El Partíu Asturianista ve nel plan una mengua de conteníos sobre la llei d'usu qu'esta mesma organización ayudare a aprebar nel añu 1998

Nel comunicáu en que fai pública la so opinión sobre'l Plan de Normalización del asturianu, al que'l Partíu Asturianista califica de "pretendíu plan" la organización que dirixe Xuan Xosé Sánchez Vicente fala de que'l plan ye un "camelo" polos sos conteníos y una burlla pa los asturianos que votaron a dos de los partíos que prometíen "facer algo" pol asturianu en referencia a IX y Bloque por Asturies

El PAS diz que toles midíes que contempla'l plan son "d'una absoluta falta de concreción y d'una vaguedá absoluta" y "ensin compromisos concretos en dineru, esfuerzu, normativa llexislativa y plazos", pero centra tola so crítica en que les midíes que contempla'l Plan yá vienen toes elles na llei d'usu del asturianu de 1998, llei que se redactare na llexislatura en que'l PAS la negociare col gobiernu del PP qu'encabezaba Sergio Marqués

El PAS ve que ta faciéndose "una llectura a la baxa" d'esta llei que d'otra manera'l Gobiernu Areces vendría "incumpliendo sistemáticamente dende 1998" un incumplimientu que'l PAS fai estensivu al gobiernu conxuntu PSOE - IX

El PAS fina'l so comunicáu acusando al gobiernu de facer "palabrería" col plan na víéspora d'una manifestación convocada pal 5 de marzu que tien precisamente la intención de denunciar los incumplimientos del Gobiernu asturianu na materia, la mentira electoral de IU al prometer la oficialidá del asturianu . El PAS acusa al gobiernu de facer "falta de voluntá social normalizadora y de persecución efectiva contra l'asturianu y los sos falantes".