El PAS llama “charramplín” a Ovidio Sánchez

Énte les declaraciones del líder del Partíu Popular n'Asturies, nes que pidía p'Asturies la declaración de nacionalidá histórica, el Partíu Asturianista considera que Sánchez ye un "charramplín" y que-yos miente a los asturianos.

La formación política de Xuan Xosé Sánchez Vicente diz nun comunicáu de prensa qu'ellos son los únicos que lleven dende 1985 reclamando esi status y que na reforma estatutaria del 98 PSOE y PP negáronse a ello cuando lo propunxo'l PAS.

La formación asturianista diz que la propuesta concreta del PP amás nun significa nada, en cuantes que la fórmula concreta "nacionalidá histórica" nun tien reconocimientu nel artículu 2 de la Constitución. El Pas conclúi afirmando que les declaraciones d'Ovidio Sánchez nun tienen seriedá nenguna y son un "rutiazu d'insustancialidá política veraniega"