El PAS apuesta pol continuismu

El Partíu Asturianista celebró esti fin de selamana na so sé de Xixón el IV Congresu Nacional de la formación, del que salió una directiva de llinia continuista cola qu'había y na que la figura de Xuan Xosé Sánchez Vicente sigue a la cabeza del proyectu.

Muncho s'especuló de les elecciones de mayu p'acá col futuru del PAS. El futuru de la histórica formación asturianista, que quedó otra vegada fuera del parlamentu y rexistró los sos peores resultaos dende la etapa fundacional a mediaos de los 80, taba colingando d'un filu ente comentarios qu'aporfiaben pola refundación del partíu, abrir un camín pa la xuntura con otres fuerces o hasta cola propia desapaición del partíu. Toe eses duldes teníen d'iguase nel congresu d'esti fin de selmana, del qu'a la fin salió un apueste continuista. La llista única que se presentaba al congresu, encabezada por Xuan Xosé Sánchez Vicente, consiguió'l 75% de los votos, quedando la otra cuarta parte en blanco

Sicasí, la votación de la nueva directiva nun quier dicir que la cosa fore un bañu d'aceite. Balbuena, candidatu del PAS por Xixón nestes elecciones y ún de los militantes más activos del partíu dende va unos años p'acá, presentó ayeri la dimisión de tolos cargos, diciendo que'l partíu, cola reelección de Sánchez Vicente daba una imaxe d'involución y que'l líder históricu del PAS tenía, pa ser bien, que dimitir depués de los dos fracasos electorales colos qu'arrecostina'l partíu. Paradóxicamente, Balbuena diba dientro de la llista oficial que s'escoyó'l sábadu, lo que parez que-y quita chapeta, pero'l mesmu dimisionariu, reconociendo la debilidá interna de la organización, diz qu'aceptó dir na llista oficial porque nun alcontró xente pa facer otra llista. Da la circunstancia de que nes pasaes elecciones de mayu, en conceyu de Xixón, feudu tradicional del PAS, Balbuena consiguió más votos pa les municipales que la candidatura del PAS pa les autonómiques.