El paru xube en 6.070 persones en xineru n'Asturies y algama la cifra de 96.607 desemplegaos

Les cifres del paru continúen medrando n’Asturies a un ritmu de vértigu. Nel mes de xineru, 6.070 persones perdieron el so emplegu, lo qu’acerca les cifres del paru a la barrera nunca vista de los 100.000 paraos al rexistrar 96.070.

Según los datos daos a conocer güei pol Ministeriu d’Emplegu y Seguridá Social, el númberu de persones ensin trabayu medró nesti mes últimu un 6,70 por cientu, cifra mui superior al 1,90 por cientu rexistráu n’avientu. Ello convierte a Asturies nel tercer territoriu estatal nel que más crecen les cifres de desemplegaos, namái superaos por Euskadi (7,20 por cientu) y Navarra (6,82 por cientu). La media estatal ye del 4,01 por cientu, siendo los llugares onde menos xube’l paru Illes Balears (0,86 por cientu), Melilla (1,03 por cientu) y Extremadura (2,46 por cientu). El total paraos nel Estáu ye de 4.599.829 tres sumar 177.470 en xineru.

En términos añales, Asturies rexistró 10.599 desemplegaos más, lo que supón una medra del 12,32 por cientu, tamién superior a la estatal, que ye del 8,72 por cientu. Tienen cifres peores que’l nuesu país Ceuta (22,30 por cientu), La Rioja (15,62 por cientu), Extremadura (13,54 por cientu) y Cantabria (13,27 por cientu). Mentes, presenten les ‘meyores’ cifres Melilla (3,83 por cientu), y Catalunya y la Comunitat Valenciana (7,39 por cientu).