El paru sigue medrando n’Asturies con 1.507 paraos más en payares

El númberu de paraos rexistraos nes oficines del Inem n’Asturies al términu del mes de payares subió a 79.647, lo que supón un aumentu de 1.507 persones al respecto d'ochobre.

En términos relativos, l'aumentu del paru nel mes de payares nel Principáu foi del 1,93 por cientu sobre'l mes de setiembre, mientres qu'en términos interañales -nos últimos 12 meses- queda ente les CC.AA onde más creció, un 8,96 por cientu, más de dos puntos penriba de la media nacional (6,24 por cientu).
    
No que respecta al paru masculín, ésti quedó nel Principáu en 37.267 persones,  mientres que'l femenín algamó un total de 42.380 persones.
  
Por sectores, el paru subió en Servicios en 988 persones; siguíu de la construcción 239; el colectivu sin empléu anterior elévase en 172 paraos más; el de la Industria en 77 persones y en 31 el de l'Agricultura.
  
En cuanto al númberu d'estranxeros en paru nel Principáu la cifra sube a 5.083. El sector con más estranxeros en paru ye Servicios (3.147), siguíu de Construcción (1.252), Industria (384) y el colectivos Sin Empléu Anterior (818).
  
Contratación
Mentanto, el númberu total de contratos nel Principáu baxó en  payares en relación al mes anterior en 3.403 (un 13,28 por cientu menos), asitiándose en 22.225 contratos totales. N'España la contratación baxó un 6,58 per cientu.