El paru frena la so medra n’Asturies al crecer en 35 persones en marzu

Tres meses de crecimientu constante, nel mes de marzu’l paru medró namái en 35 persones n’Asturies. La cifra total de desemplegaos algama agora la cifra de 99.388, un 13,28 por cientu más qu’hai un añu.
 
La medra relativa del paru en marzu foi del 0,04 por cientu n’Asturies, mente que nel Estáu foi del 0,82 por cientu al sumar 38.769 desemplegaos más, lo que sitúa la cifra total de paraos en 4.750.867. Los únicos territorios onde menguó’l númberu de persones ensin trabayu foi n’Illes Balears (2,27 por cientu), Navarra (0,75 por cientu) y Catalunya (0,58 por cientu). Por contra, l’ascensu mayor del paru rexistróse en Melilla (2,06 por cientu), Ceuta (2,01) y Castilla-La Mancha (1,87 por cientu). Hai que destacar que de los 99.388 paraos qu’hai n’Asturies, 50.357 son muyeres frente a 49.031 homes. Amás, 9.628 tienen menos de 35 años.
 
En términos añales, el desemplegu medró a nivel estatal en 417.198 persones, un 9,63 por cientu. Ceuta ye’l territoriu onde más creció’l paru nesti últimu añu, un 19,21 por cientu, siguíu de Castilla-La Mancha (14,64 por cientu) y Navarra (13,79 por cientu). Pela parte baxa de la llista tán Catalunya (4,41 por cientu), Euskadi (6,84 por cientu) y la Comunitat Valenciana (7,59 por cientu).