El Partido Popular ruempe negociaciones con Foro Asturias

El PP decidió esti miércoles romper les negociaciones con FAC a menos d’una selmana pa la celebración del Plenu d’Investidura. Esta situación llevaría a un Gobiernu en minoría del partíu de Francisco Álvarez-Cascos.
 
Menos de cinco minutos sirvieron pa que los representantes de les dos formaciones dieran por terminaes les negociaciones de cara a apoyar a Álvarez-Cascos como presidente d’Asturies nel Plenu d’Investidura previsto pal martes –les votaciones van celebrase’l miércoles 13–. Foro Asturias Ciudadano (FAC) entregó a los populares el so pautu de llexislatura que, darréu, refugó’l Partido Popular (PP). Según esplicó poco depués la vocera popular Isabel Pérez-Espinosa, esta propuesta de FAC supón “falsear” el resultáu de les urnes porque, na so opinión, el partíu del ex ministru de Fomentu actúa como si tuviera 26 diputaos cuando namái tien 16. “La mayoría de los asturianos nun pidieron que sía FAC quien gobierne; yo nun puedo camudar el resultáu del 22 de mayo”, alvirtió.
 
Mentes, el voceru de Foro Asturias, Enrique Álvarez Sostres, mantién la decisión del so partíu de refugar un gobiernu de coalición colos populares n’Asturies.
 
Otra manera, tres la rotura de les negociaciones ente estes dos formaciones los nuesos llectores pueden opinar en Conceyu Abiertu qué va pasar na votación del miércoles na que podría salir el presidente próximu d'Asturies. Al mesmu tiempu, tamién van poder siguir opinando na encuesta sobre cuál ye la folixa más prestosa del branu.