El parque de la discordia

La Comisión de Mediu Ambiente de la Xunta Xeneral del Principáu debatió el mes pasáu el proyectu de llei del Parque Natural de les Fontes del Narcea. Esti parque natural, qu'albarca más de 550 kilómetros cuadraos ente los conceyos de Cangas del Narcea, Ibias y Degaña, ta convirtiéndose nun de los más polémicos y difíciles de sacar alantre pal gobiernu, que presentó una llei que nun concueya colos intereses particulares que-yos toca convivir nesi espaciu. Nun país como Asturies, onde'l 30% del suelu tien dalguna clase de protección natural, nunca una declaración d'estes característiques armó tantísimu escándalu, presentándose al anteproyectu de llei del Parque más de 1000 testos d'alegaciones. Ello ye que les más de les finques qu'entraríen al parque llévenles particulares qu'entienden que nun tendríen actividá nenguna que desarrollar nesa tierra depués de declaráu el Parque, que vendría a suponer pa ellos una espropiación forzosa y el desaniciu dafechu de los usos tradicionales del llugar. Pa enguedeyar más la cuestión, la zona ye'l noyu d'una importante actividá maderera, arriendes de delles mines de carbón a cielu abierto. Mientres les empreses de la madera quieren que se-yos tenga en cuenta na redacción de los estatutos del parque, que pescancien tal y como tan redactaos como un ataque al so llabor, les tres empreses mineres del llugar pidieron cenciellamente, quedar fuera del mesmu. Namás el Gobiernu asturianu y dellos colectivos ecoloxistes concueyen dafechu col actual proyectu de parque, que los ecoloxistes defenden nesti durísimu comunicáu, pero lo cierto ye que'l Parque nun ñaz col sofitu de los que tendrán que vivir nelli, qu'inda s'entruguen a que preciu van tener que pagar el ser espaciu protexíu. Los partíos políticos representaos na Xunta Xeneral nun son a ponese d'alcuerdu. Ente'l sofitu incondicional del Psoe y ella refuga total del PP, Izquierda Xunida, que de mano pidía la "declaración inmediata" d'esti parque natural, fala agora de buscar una postura de consensu qu'enxerte nel proyectu de parque a tolos sectores implicaos. Esti mes, proponemos en Conceyu Abiertu un debate sobre'l Parque de les Fontes del Narcea. Dexa la to opinión nos tableros y na encuesta