El Parlament declara que’l derechu de Catalunya a l’autodetermín ye “irrenunciable”

CiU, ERC y ICV aprobaron una moción de Solidaritat Catalana per la Independencia (SI) na que reivindiquen el derechu “irrenunciable” de Catalunya al autodetermín. El Parlament tamién apoyó les consultes populares.
 
Les cuatro formaciones polítiques reconocen l’autodetermín “como un derechu irrenunciable del pueblu de Catalunya”, dalgo que nun tien nengún valor xurídicu pero que supón la primer vegada na que’l Parlament considera como “irrenunciable” esti derechu. Les otres ocasiones nes que Catalunya reclamó l’autodetermín foi nos años 1988, 1999 y 2010.
 
La moción inicial presentada por SI solicitaba otros apoyos por parte del Parlament, como’l sofitu a la independencia de Kosovo, anque al final lo que s’aprobó foi’l  derechu d’autodetermín de Catalunya y l’apoyu a les consultes populares que lleven años faciéndose en dellos municipios catalanes. En concreto, el Parlament fixo referencia a la que va tener llugar na ciudá de Barcelona’l 10 d’abril. Hai que señalar, qu’esti puntu últimu nun contó col votu a favor d’Iniciativa per Catalunya Verds (ICV), qu’optó pola abstención al entender qu’estes consultes son utilizaes como armes polítiques polos partíos.
 
Uriel Bertran, voceru de SI, destacó esta mañana que les consultes populares son “el procesu más maravillosu qu’organizó l’independentismu enxamás” y consideró que la moción aprobada ye un pasu importante nel camín hacia la independencia de Catalunya.