"El País" vuelve a tener conteníos de baldre

El diariu xeneralista español de mayor tirada en papel ficiere va trés años un apueste polos conteníos de pagu na so edición dixital, que pasó nel 2002 a ser solo p'abonaos. La estratexa de la cabecera del grupu Prisa, que tamién siguieren d'aquella munchos diarios nos EEUU nun cuayó, y dende güei, dellos conteníos de la edición dixital d'esti prestixosu diariu pasen a ser de baldre, siguiendo l'exemplu de les cabeceres del otru llau del atlánticu, que tamién adoptaron fórmules intermedies ente l'accesu abiertu y les soscripciones . Nesti tiempu, El Mundo, diariu rival d'El País, aprovechó la falta de competencia d'esti pa convertise na páxina web de fala castellana más visitada.

Agora, El País intenta amenorgar distancies y abandona'l modelu "de pagu dafechu" pa pasar a un modelu amestáu nel que los internautes van tener accesu a les noticies d'última hora, una esbilla de les noticies de la edición impresa y dellos conteníos multimedia, mientres que los 45.000 suscriptores de pagu d'El País van caltener privilexos, accediendo a arees llendaes al común de los internautes, como son los conteníos del diariu francés Le Monde, la emisión en directo de la canal de noticies CNN+, les emisores del grupu Prisa, los teletipos de l'Axencia EFE y la hemeroteca del diariu.