El númberu de positivos nuevos, el más baxu de tol estáu d'alarma

Asturies rexistró 17 casos esti llunes nuna xornada con 2.487 muestres procesaes pa determinación de la COVID-19.

Dende'l 16 de marzu, día nel que'l Ministeriu de Salú entamó a centralizar los datos de les comunidaes autónomes pola declaración del estáu d'alarma, el país nun rexistró una cifra tan baxa de positivos nuevos por coronavirus SARS-CoV-2 como la d'ayeri. Tres 1.800 pruebes por PCR y 687 por test d'anticuerpos, deteutáronse 17 afeutaos pa poner el total de casos en 2.365, de los que 1.547 tán activos, 2 menos que'l domingu.

Na xornada tamién se rexistraron 17 curaciones (616), con 3 pacientes menos na UCI (53) y 5 en planta (253). Mentes, hebo que llamentar 2 muertes, la cifra más baxa dende'l día 2, cuando finó una única persona, y la mesma que'l miércoles pasáu.