El nuevu HUCA presenta un sobrecostu del 44%

El director xerente de Xestión d'Infraestructures Sanitaries del Principáu (Gispasa), Alfonso de Carlos, señaló que yá se ta trabayando nes licitaciones pa los contratos de caltenimientu del nuevu HUCA. La previsión, con sobrecostu, ye d’unos 23 millones d'euros añales.

De Carlos ofreció esti datu nel momentu de la so comparecencia na Comisión d'Economía y Facienda de la Xunta Xeneral del Principáu d'Asturies (JGPA), onde acudió a informar de la política de contratación.
  
El caltenimientu al que se refirió De Carlos toma dellos aspectos, como llimpieza, xestión de residuos, reposiciones, vixilancia, desinfectación y desratización, serviciu de telefonía y televisión, esplotación de llocales comerciales o caltenimientu de xardinos y viales. Nun tán incluyíos aspectos como la llavandería o la cocina.
  
En tou casu, Alfonso de Carlos, señaló que prevé que'l costu final del caltenimientu seya una cifra inferior a esos 23 millones d'euros. "Pero eso nun lo vamos saber hasta que s'axudiquen los contratos", comentó.
  
Sobrecostu del 44%
Na so intervención, De Carlos refirióse a la fecha d'acabación de la obra civil del nuevu HUCA, establecida'l 31 d'avientu del 2010. El proyectu axudicóse de primeres en 205 millones, pero darréu los modificaos fixaron el costu en 295 millones. A esa cifra tamién va haber qu'añadir otros 95 millones previstos n'equipamientu.
  
De Carlos calcó en que los modificaos valen precisamente pa meyorar la calidá d'un complexu sanitariu que va ser "ún de los meyores hospitales a nivel internacional". Y amás dixo que gracies a los procedimientos de contratación de Gispasa llogróse "aforrar".

Asina, esplicó que, por exemplu, nun se contempla la revisión de precios, y que s'aforraron 34 millones sobre los 295 millones que va costar la obra finalmente. Tamién señaló que'l fechu de pidir un préstamu al Bancu Européu d'Inversiones (BEI) ofrez más ventayes que si se recurrió a la banca comercial.
 
Crítiques del PP
Estes esplicaciones del xerente de Gispasa nun convencieron al PP. Asina, la diputada popular Alejandra Cuétara, mostróse sorprendida de que De Carlos "presuma" nun proyectu que presenta un sobrecostu del 44 por cientu. "Nun creo qu'usté seya tan desdexáu col so patrimoniu priváu, y mientres, se muestre tan gallu col dineru públicu"
  
Cuétara quiso sacar asina "tarxeta colorada" a De Carlos por ser un "mal xestor". Amás, la diputada del PP criticó'l llabor de De Carlos y dixo que de 990 contratos, namás diez se realizaron promoviendo la competencia. "El restu diéronse a deu", dixeron. El diputáu del PP, Carlos Galcerán, tachó a Gispasa de "chiringu" pa "colocar a amigos".