El 'non' gana n'Alba

El pueblu escocés dixo non a la independencia d'Alba del Reinu Xuníu al sumar esta opción el 55,3 por cientu de los votos nel referéndum celebráu'l xueves. La participación algamó'l 84,48 por cientu y la diferencia ente'l 'sí' y el 'non' foi de 383.937 votos.

D'esta forma, Dùn Èideann va siguir xunío a Londres, anque espera algamar mayores competencies tres consiguir un total de 1.617.989 votos favoratibles a la independencia (44,7 por cientu del total), según señaló'l ministru principal d'Alba, Alex Salmond, tal y como prometieron los xunionistes mientres la campaña. Por contra, dende'l llau británicu celebren los resultaos y, en pallabres de David Cameron, van entamase conversaciones pal treslláu de poderes, dalgo de lo que tamién van beneficiase galeses, norirlandeses y ingleses.

El 'sí' ganó en cuatro circunscripciones de les 32 esistentes n'Alba, destacando'l trunfu na ciudá de mayor población del país, Glaschu/Glasgow (53,49 por cientu), y en Dùn Dèagh/Dundee (57,35). Siorrachd Lannraig un Tuath (51,07) y Siorrachd Rinn Friù (53,96) son les otres dos zones eleutorales con mayoría independentista. L'ésitu mayor del 'sí' foi nes islles Arcaibh, con un 67,2 por cientu d'apoyu de la so población a caltener la xunión con Londres.