El Nomenclátor Xeográficu de la Toponimia Oficial d’Asturies asitia nel mapa 16.641 nomes de llugar

Yá ta a disposición de tola ciudadanía, depués de 6 años de trabayu, el Nomenclátor Xeográficu de la Toponimia Oficial d’Asturies. Completa los decretos d’oficialización llocalizando los diferentes nomes de llugar de 63 conceyos nel mapa, 12.000 d'ellos d'entidá menor a aldees.

El portal SITPA-IDEAS acueye’l Nomenclátor Xeográficu de la Toponimia Oficial d’Asturies, que xeollocaliza 16.641 topónimos. El catálogu, que se pue consultar nesti enllaz, recueye en concretu 620 parroquies; 63 capitales de conceyu; 42 núcleos urbanos; 20 urbanizaciones; 31 barrios urbanos; 4.160 pueblos, aldees y barrios; 5.135 barrios interiores; 5.590 quintanes; y 980 llugares.

Ovidio Zapico, conseyeru d’Ordenación de Territoriu, Urbanismu, Vivienda y Derechos Ciudadanos, presentólu esta mañana nun actu nel que tuvo acompañáu pola responsable de Cultura, Política Llingüística y Deporte, Ana Vanessa Gutiérrez, y de la direutora xeneral d’Urbanismu, Laura López Díaz. “Ye una ferramienta que permite definir sobre un mapa una escomanada cantidá de toponimia, que nun podemos consentir que se pierda porque ye un llegáu cultural que tamos obligaos a preservar y dexar a les xeneraciones que vienen”, rescampló Zapico.

“El llabor que lleva desarrollando’l Serviciu de Cartografía xunto cola Conseyería de Cultura nos últimos ye un trabayu realmente mui minuciosu”, apuntó mentes Gutiérrez sobre un trabayu que se va siguir completando. “Avanzamos en cuestiones fundamentales como ye la normalización”, añadió’l coordinador xeneral d’Izquierda Xunida (IX), que confirmó’l compromisu del Gobiernu y de la so conseyería cola oficialidá.

Dende’l 2018

Los trabayos pal desendolcu del Nomenclátor Xeográficu de la Toponimia Oficial d’Asturies entamaron nel 2018. L’oxetivu yera ellaborar un rexistru dinámicu que non sólo recueya les denominaciones oficiales referenciaes xeográficamente, sinón que tamién les codifique, xerarquice y categorice. Enfrentábase asina a la xeollocalización y organización territorial de 23.944 topónimos oficializaos en tol territoriu.

Llueu de más de cinco años de trabajo llocalizáronse 16.641 topónimos oficiales de 63 municipios, de los que 11.214 nun tán reconocíos como entidaes de población pol Instituto Nacional de Estadística y cerca de 12.000 correspuéndense con allugamientos de tamañu inferior a los pueblos o aldees, esto ye, los categorizaos como quintanes, cases, barrios urbanos y barrios interiores, ente otros. Son, poro, topónimos difíciles de señalar al resular na mayor parte de les ocasiones conocíos namás poles vecines y vecinos de la zona.

Na semeya, López Díaz, Gutiérrez y Zapico.