El nietu de Belarmino Tomás afíliase al partíu d'Álvarez-Cascos

|

Rafael Fernández Tomás, nietu de Berlarmino Tomás y fíu de Rafael Fernández, presidente del Consejo Regional de Asturias ente 1978 y 1983, afilióse a FAC. Toma esta decisión pese a asegurar que la so ideoloxía nun camudó.
 
Foro Asturias Ciudadano (FAC) anunció esti ‘fichaxe’ na sede xixonesa del partíu nun actu nel que, amás de Fernández Tomás, tamién tuvieron presente Francisco Álvarez-Cascos y Carmen Moriyón, posible presidente d’Asturies y alcaldesa de Xixón nesta llexislatura. Al traviés d’un escritu, el nietu del históricu dirixente socialista, llíder de la revolución d’ochobre del 34, diputáu por Asturies y presidente del Conseyu Soberanu d’Asturies y Lleón, Belarmino Tomás, señaló que n’Asturies hai un sentimientu d’ilusión que llogró en cinco meses axuntar a más de 10.000 militantes y apostó por establecer llazos de comunicación colos centros asturianos en tol mundu pa facer proyeutos comerciales, d’inversión, teunoloxía y cultura.
 
“Debemos lluchar pola rexeneración social, económica y política d’Asturies, contra’l manexu de los despilfarros, del dineru negru y declarar tolerancia cero a la corrupción venga de donde venga”, continúo Fernández Tomás, que diose de baxa nel PSOE l’añu pasáu. Tamién encamentó a dexar atrás “el maniqueísmu vieyu de que toos son roxos o faches que mantuvieron los dos grandes partíos y l’asturianismu tan típicu de ‘a ver’ y sustituyilu por 'vamos facer'.
 
Según Fernández Tomas, n’Asturies “tenemos historia, pueblu y recursos, y los que nos falta, capacidá pa crealos”, pa depués destacar a “formigues” como Gaspar Melchor de Xovellanos, Rafael Riego o Manuel Llaneza. D’igual forma, defendió la creación de la Universidá Politéunica Xovellanos propuesta por Álvarez-Cascos y refugó la privatización de les caxes d’aforros.
 
Tamién tuvo pallabres pa Jesús Gutiérrez, secretariu d’Organización de la Federación Socialista Asturiana (FSA), que calificó a FAC como “estrema derecha finlandesa”. Ello, pa Fernández Tomás, “confirma la desvinculación total d’esa clase política socialista actual de la realidá asturiana y el por qué del fracasu del 22-M”. A Gutiérrez reprochó-y que “mintiera” al echar la culpa al corréu de que nun llegaren los votos de los emigrantes y recordó que foi’l PSOE y el PP quienes “entorpecieron el procesu pa evitar esa votación”, pa depués pidir un cambiu del procesu eleutoral.
 
Álvarez-Cascos, pela so parte, animó a Fernández Tomás a que nun rebaxara les sos esixencies “para facenos meyores a toos”. Mentes, Moriyón agradeció la so visita y resaltó que ye la primer persona illustre que recibíen na sede xixonesa de FAC.

Comentarios

Ye persabiu que, non ye elli l'unicu  que se acoyo a esi partiu,tiniendo otra tendencia politica.Munchos asturianistes fixeron lo mesmu!!! porque pa trabajar, pa Asturies hai que, pactar con el mesmu diablu...
Toos lo  fixeron con la ilusion que, Cascos faiga dalgo en Asturies i pa Asturies.Ya tamos fartos de non tener una alternativa, sempre los mesmos perros, con los mesmos collares!!..
Nuesa confianza ye que se faga una politica veramente asturiana,non tien que,ser dende la ezquierda..pa eso xa ta IU i facen mui pocu.

Nestos próximos 4 años el nuesu trabayu como asturianistes o nacionaliegos (nel mio casu) que votamos una opción como la de Cascos, que sin ser nacionaliegu si plantea una opción asturiana para Asturies fuera del centralismu del PP y del PSOE sería trabayar dende dentro por unificar y congregar a too esi referente de xente que como nosotros apostó por esti proyectu. Xente como Ignacio Ilesias y otros muchos como él que hoy solo tuviemos enrriba la mesa a Cascos deberiemos empezar a estructuranos y aprovechar la oportunidad de ser una fuerza de influencia nesti partiu hasta que nun haya otra opción posibilista enrriba la mesa.

Contador Estadistiques