El navegador asturianu que puede col Explorer

El tarrén de los programes de navegación pa movese pela internet lleva tiempu domináu pol Internet Explorer, ún de los productos más nomaos de la casa Microsoft, que desanició la única oposición que tenía, la del Netscape Navigator. Sicasí, l'amu y señor nun ye l'únicu programa que tenemos p'acompañanos mientres rabilamos pela rede, y ye que, amás de les alternatives convencionales como'l Netscape, tamién hai programes de códigu abiertu, que nun apadrina una casa comercial y nos qu'andechen programadores de tol mundu. Ún d'estos programes ye'l Mozilla, del qu'esiste una versión en llingua asturiana. Al ser Mozilla un programa de códigu abiertu, cualquier programador puede cambiá-y l'idioma en que funciona, cosa que nunca nun va pasar con un programa de software propietariu como l'Explorer, que nunca se fadría n'asturianu nun siendo que Microsoft ganare perres con elloLa noticia ye que, amás de valir pa esparder l'asturianu peles nueves tecnoloxíes, parez qu'emplegar Mozilla tamién ye más amañoso. Nesti web alcontramos les 101 coses que pueden facese con Mozilla y que nun nos dexa facer l'Explorer. Ente les utilidaes que nun ufierta la casa de Redmond y que sí tenemos nel navegador de códigu abiertu ta el poder trancar la invasión de los cafiantes pop-ups de propaganda, controlar les cookies o nun dexar que los auto-executables que vienen en delles páxines arranquen solos, arriendes de bien de meyores no que ye visibilidá y navegación.