El númberu d’hectárees quemaes aumentó más d’un 50 por cientu pese a que se rexistraron menos incendios

Los once meses primeros del añu rexistraron un total de 1.641 incendios forestales n’Asturies que provocaron la quema de 12.111,54 hectárees. La superficie afectada ye mayor que la del añu pasáu pese a haber menos fuegos.
 
Nel 2010, el númberu de quemes foi de 1.846 incendios, acabando con 7.980,46 hectárees de monte, según los datos del 112-Asturies. Ello supón una medra de más del 50 por cientu, cifra importante que pa la Coordinadora Ecoloxista d’Asturies “dexa n’evidencia la prevención d’incendios forestales” nel país, que sigue “fracasando de forma estrepitosa por culpa de la dexadez y incompetencia del Principáu al nun saber axustar les midíes de prevención a les causes que realmente provoquen la mayoría d’ellos: la creación y rexeneración de pastos pal ganáu”.
 
Los ecoloxistes, qu’apunten que’l númberu d’incendios que tienen el so orixe en motivos ganaderos ye del 83 por cientu, proponen tres llinies d’actuación que lleven defendiendo dende hai años pa frenar estes práutiques y que yá treslladaron al Conseyu Forestal y al Conseyu del Fueu. La primera ye la persuasión al traviés de la información, dando a conocer a los ganaderos el dañu qu’ocasionen les quemes, mentes que la segunda son les midíes alternatives: desbroces mecánicos, creación de pastos y quemes controales. Por último taríen les midíes coercitives, como la prohibición del usu pal ganáu de zones que quemaren y la retirada de les ayudes.