El númberu d’aficionaos deteníos polos incidentes del Sporting-Genoa algama la cifra de 24

La Policía detuvo esti martes a diez ultras del Sporting polos incidentes previos al XV Troféu Villa de Xixón, celebráu’l 13 d’agostu. D’esta forma, el númberu de deteníos pola pelea entre radicales del Sporting y el Genoa llega a la cifra de 24.
 
Nun primer momentu, los axentes detuvieron a 14 aficionaos, dos asturianos y 12 italianos, tres la pelea que tuvo llugar media hora enantes del comienzu del partíu na zona del Quilometrín, na que s’utilizaron palos, bates de béisbol, tuerques, botes de fumu y bengales. Tres l’enfrentamientu, dellos italianos tuvieron qu’acudir al Hospital de Cabueñes o al Centru de Salú El Parque-Somió pa ser atendíos de feríes de pequeña consideración.
 
Les investigaciones policiales permitieron agora la detención de diez ultras venceyaos al grupu Ultra Boys que tuvieron una participación activa na pelea. Estos radicales tienen edaes comprendíes ente los 20 y los 33 años y dellos cuenten con antecedentes pola so participación en fechos similares. Ún d’ellos, tres les comprobaciones pertinentes y declarar, quedó en lliberta. Les dilixencias abiertes pola Policía van remitise al Xulgáu d’Instrucción númberu 1 de Xixón.