El MUXA incorpora una escena nueva nel esterior del recintu museísticu

|
Sandra Cuesta y Antón García

Antón García visitó'l muséu pa dar a conocer les figures nueves y les actividaes previstes pa la ponte festiva na instalación, que se suma a la XXIX 'Semana de les Fabes de Colunga'.

Acompañáu de l'alcaldesa Sandra Cuesta, el direutor xeneral de Política Llingüística, conoció la escena nueva del Muséu del Xurásicu d'Asturies (MUXA). Trátase d'un ñeru de triceratops, con güevos y dalgunes críes fuera de la cáscara, xuníos a dos exemplares yá esistentes d'estu dinosauriu herbívoru del Cretácicu, que presenten una tonalidá nueva.

Esta representación súmase a la de la pareya de deynonychus y carnotaurus, y la d'un exemplar adultu de brachiosaurus con dos críes, amás d'otres répliques de dinosaurios del Xurásicu. La Fundación Española para la Ciencia y la Tecnología, del Ministeriu d' Economía, Industria y Competitividá, collaboró con una aportación económica a la escena nueva colos triceratops.

García tamién presentó les actividaes previstes pa estos próximos díes festivos y la Navidá nel MUXA. Na ponte coinciden cola 'Semana de les Fabes de Colunga', que se celebren nos restoranes del conceyu ente mañana y el llunes con menús y precios diversos, cola posibilidá d'algamar tarifa reducida pa visitar el muséu cola presentación de la factura.

Contador Estadistiques