El músicu asturianu Ángel Ruiz, finalista nun concursu internacional... con un tema pa banjo

Qu'un asturianu seya ún de los meyores tocando'l banjo n'España yá ye noticia, pero qu'amás tea finalista nun concursu internacional de composición merez la nuesa atención.

Ángel Ruiz ye un músicu nacíu en Galicia, concretamente en O Barco de Valdeorras, pero que dende va munchos años vive en Xixón. El so interés por esti instrumentu tan particular, el banjo, nació va trece años cuando lu sintió per primer vegada en Madrid, y partir d'esi momentu la so vida fízose alredor de les cinco cuerdes d'esti instrumentu. Col tiempu y años d'estudiu, Ángel Ruiz fue quien a algamar una técnica perbona dominando estilos como'l rock, blues, bluegrass o el folk. Esti dominiu llevólu por exemplu a collaborar nel discu de "Lliberdón" "Tamos Fartos", pa más tarde entrar a forma parte del grupu "Skitarna" col que grabó un discu.

Anque "Skitarna" va tiempu que se desfizo, esti músicu siguió trabayando, y agora ye finalista del "International Songwriting Competition". Ángel Ruiz ta presente na categoría instrumental col tema "Banjo Blues", y opta a un premiu de 10.000 dólares n'efectivo y 30.000 dólares en mercancía. Amás del premiu que va apurrir el xuráu, onde hai xente como David Hidalgo de "Los Lobos" o Monte Lipman presidente d'Universal Records, hai tamién un premiu del públicu al traviés de votaciones na propia páxina web del concursu.

Con too y con ello la carrera d'Ángel sigue p'alantre, y el so últimu trabayu foi nel último discu Michael Lee Wolfe, "Corners of the World", onde presenten el so bluegrass trepidante made in Asturies. Pa conocer a esti músicu y el soníu de los "Lee Wolfe y sus Bluerangers" hai que tar sollertes a los conciertos de Radio 3 en "La 2" de Televisión española, ya que'l grupu va grabar el día 10 de marzu un conciertu que va emitise nuna fecha inda por concretar.