El Muséu Marítimu de Lluanco presenta un astilleru tradicional

La carpintería, con tolos preseos y ferramientes orixinales, vieno al muséu lluanquín tres de la retirada del oficiu, por xubilación, del so amu

El Muséu Marítimu de Lluanco ta acabante d'enanchar la so esposición permanente cola llegada de tolos preseos y ferramientes d'ún de los trés últimos astilleros tradicionales que quedaben n'Asturies. Cola retirada del oficiu d'un de los vieyos artesanos de Gozón, el muséu consiguió la cesión de tolos materiales del vieyu taller, iguando con ellos, y con otres pieces que quedaben de los antiguos astilleros d'Artime y de Nolo un completu taller tradicional de construcción de barcos de pesca de madera, incluyendo dende les ferramientes (azueles, formones, martiellos y sierres) hasta les plantiyes coles que se facíen les pieces.

Pa enseñar como avanza'l procesu de construcción enséñase la cadarma d'una lancha entamando a construyise y otra yá coles más de les pieces nel so sitiu. Les dos pieces "en construcción" pertenecen a lo que los conservadores del muséu llamen "lancha de tipu asturianu" que, a diferencia de la cántabra, gallega o vasca, lleva una pieza de madera cubriendo perbaxo la hélice, una adaptación que vien de que n'Asturies les lanches sacábense tolos díes a rastru dende l'agua hasta la tierra.

El pieslle del astilleru qu'agora pue contemplase en muséu Marítimu de Lluanco dexa a Asturies con namás dos astilleros tradicionales dedicaos a les embarcaciones de madera de pequeñu tamañu, ún en Gozón y l'otru en Castropol. Especialistes nel tema llamenten que n'Asturies nun se faiga un apueste más decidíu por esti oficiu artesanu, cuando n'otros llugares como por poner un casu Galicia o Portugal muncha xente que quier una embarcación de recréu apuesta pola recuperación de les embarcaciones tradicionales y esisten asociaciones y clubes qu'organicen alcuentros y xornaes dedicaes a estes embarcaciones.

L'asociación Cultural Dorna, qu'organiza n'Arousa cursos de navegación con embarcaciones tradicionales o la Federación Galega pola Cultura Maritima, qu'organiza cada dos años un alcuentru d'embarcaciones tradicionales son un exemplu d'ello. Esta actividá caltién tamién a dellos talleres tradicionales, qu'alternen la construcción de los barcos y lanches de tola vida cola de pesqueros pequeños con eslores d'hasta 22 metros.
Pa saber más sobre la carpintería de ribera n'Asturies pues consultar esti enllaz