El Muséu del Holocaustu de Xerusalén 'Yah Vashem', Príncipe d'Asturies de la Concordia

'Yad Vashem', el Muséu del Holocaustu de Xerusalén, ye'l galardonáu col Premiu Príncipe d'Asturies de la Concordia, que se falló ayeri nel Hotel Reconquista d'Uviéu.

El xuráu encargáu de fallar el Premiu Príncipe d'Asturies de la Concordia reconoz del Muséu de Xerusalén 'Yad Vashem', el so llabor pa promover la "superación del odiu, el racismu y la intolerancia".


Nel acta, que lleó'l presidente del Principáu qu'exercía a la so vez de presidente del xuráu, Vicente Álvarez Areces, considérase a la institución galardonada como "un recuerdu vivu d'una gran traxedia histórica".

La candidatura del Muséu del Holocaustu propúnxola Angela Merkel, canciller de la República Federal d'Alemaña. Al premiu optaron amás otres 46 candidatures, ente les que taben la cantante Cesárea Évora, y la ex candidata presidencial de Colombia, Ingrid Betancourt, amás de la candidatura 'Democracia n'África' --integrada por Abdoulaye Wade, presidente de Senegal; Ellen Johnson-Sirleaf, presidenta de Lliberia; Amadou Tourmani Touré, presidenta de Mali; John Kufour, presidente de Ghana y el presidente de la Comisión de la Unión Africana, Alpha Oumar Konaré-.

Ente la llista de candidatos taben amás les orquestes xuveniles y infantiles de Venezuela fundaes por José Antonio Abreu; la ex presidenta d'Islandia Vigdís Finnbogodóttir; la Fundación Africana pa la Medicina y la Investigación; la Organización Mundial del Movimientu Scout; el Comité Internacional de Rescate y la ONG Mauritana SOS Esclaves.

Ésti ye'l caberu de los ocho Premios Príncipe d'Asturies que se conceden esti añu. Anteriormente galardonóse ya al presidente de la organización Alianza pa la Protección del Clima, Al Gore (Cooperación Internacional); Bob Dylan (Artes); Peter Lawrence y Ginés Morata (Investigación Científica y Técnica); Amos Oz (Lletres); les revistes Science y Nature (Comunicación y Humanidaes); Ralf Darendorf (Ciencies Sociales) y Michael Schumacher (Deportes).