El Muséu de la Sidra remocícase con motivu de los sos diez años

El Muséu de la Sidra de Nava, que cumplió estes feches los sos primeros diez años d'existencia, celebra la so primer década remocicando parte de los sos conteníos y presencia. Ente les novedaes anunciaes pol director del muséu Elías Carrocera pa esta etapa nueva va tar un espaciu acutáu específicamente a los deportes tradicionales.

La xerencia del muséu que dirixe l'historiador Elías Carrocera decidióse a enanchar los sos conteníos sobre deportes tradicionales, munchos d'ellos arreyaos a los mesmos espacios de la cultura de la sidra, en viendo l'éxitu de la "bolera virtual" del muséu. Agora, nes nueves instalaciones que van abrise esti mes van poder conocese toles especialidaes de deportes tradicionales, entamando pelos bolos y siguiendo pela rana el tiru de cuerda, la carrera de llecheres o la corta de tueros.

Xunta estos conteníos, el Muséu de la Sidra de Nava va presentar tamién una gaita orixinal del sieglu XIX y una serie de materiales rellacionaos cola industria de la sidra donaos pol SERIDA, que consisten en caxes antigües de madera pa botelles de sidra y modelos de botelles, dellos de más de cien años d'antigüedá, amás de máquines pa enllenar les botelles y pa corchales, un alambique y material de llaboratoriu. Otra de les novedaes del muséu navetu va ser que l'asturianu va ser una de les llingües nes que van poder consultase tolos testos sobre los sos conteníos espositivos.