El Muséu Etnográficu del Oriente enseña a facer sidra

El Muséu Etnográficu del Oriente d'Asturies, nel llaniscu pueblu de Porrúa, va facer una edición más del so cursu d'ellaboración de sidra tradicional, iniciativa qu'entamare nel añu 2003. Ello va ser los díes 10 y 11 d'esti mes d'avientu, nos que'l cursu va repartise nuna xornada intensiva'l sábadu y otra media xornada que va tomar la mañana del domingu.

Ente les cuestiones que van tratase nel cursu van tar el cultivu de les pomaraes y cuidaos del árbol y del frutu, que van ocupar un primer bloque nel que va falase de cuestiones como los sistemes de plantación y races de mazana, la poda, l'abonáu o los fitosanitarios venceyaos a la mazana. Otramiente, el procesu de fabricación de la sidra va tratase nun segundu bloque, pal que va contase cola participación d'un técnicu del llagar Sidra Trabanco de Xixón, que va esponer los sos conocimientos sobre mezcliendes a partir de sidra de distintos grupos técnicos de mazana, formentao de la sidra y trasiegu d'unes pipes a otres. El cursu dispón de venti places y el preciu de la matrícula ye de 30 euros.