El Muséu Barjola va acoyer una esposición coles meyores obres que participaron en NARTUR 2011

Los 19 meyores proyeutos que se presentaron al concursu NARTUR 2011 van tar espuestos nel Muséu Barjola de Xixón del 22 de xunu al 31 de xunetu. ‘Senda sonora’, de Juan José Palacios y Eduardo Comelles, foi la obra ganadora.
 
Nel I Concursu d’Intervenciones Artístiques na Naturaleza d’Asturies NARTUR 2011 participaron un total de 59 proyeutos d’autores asturianos y d’otros puntos del Estáu, amás de llugares como Francia, Venezuela, Alemaña, Irán, Brasil o Xapón, ente otros. Un total de 19 d’estos proyeutos, entes los que ta’l ganador ‘Senda sonora’, van tar espuestos nel Barjola a partir del miércoles. Nartur 2011 ye un concursu qu’entama el Grupu de Desarrollu Rural d’Altu Narcea-Muniellos cola collaboración de la Direición Xeneral de Política Forestal y el Muséu Barjola, y el patrociniu de FEADER y el Ministeriu de Mediu Ambiente y Mediu Rural y Marín.
 
La estrella de la muestra va ser ‘Senda sonora’, “una intervención plástica y fonográfica que partirá de la construcción d’un mapa sonoro de la zona”, según anuncien dende’l muséu xixonés. “El proyeuto reúne de forma perfeuta les condiciones espresaes nes bases del concursu, yá que plantega la posibilidá de xenerar un espaciu de reflexón dende’l campu del arte y crear interaiciones colos habitantes y visitantes de la zona, con un impautu medioambiental baxu”, espliquen. Palacios y Comelles, los sos autores, tienen formación tanto nel campu del arte sonoru como de les artes visuales. Yá fixeren trabayos asemeyaos en València, Dùn Èideann/Edinburgh y Xixón, pa LABoral Centro de Arte. Los dos artistes van proceder a la instalación de la so obra en Santantolín, na nomada ‘Senda de les piscines’ que va paralela al ríu Ibias, enantes del 30 d’agostu.
 
Los otros autores que van esponer nel Barjola la so obra son Rut Álvarez Valledor, Pablo Raúl Armesto González, Diego Arribas Navarro, Iraida Cano Ayala, Colectivo Hidra (Pedro Blázquez Espí y Rosana Antolí), Alejandro Fernández Palicio, Cristina Ferrández Box, Margarita García Martínez y Marianna Nieddu, Juan López-Aranguren Blázquez, Colectivo Agencia Paisaje (Lorena Lozano Álvarez, María Pérez González y Nerea Cedrón Bilbao), Ánxel Nava, Félix Orcajo Maroto, Sofía Quiroga Fernández, Francisco Jesús Redondo Losada, Ruth Rodríguez Flórez, Isabel de la Sierra, Avelino Sala Calvo y Tadanori Yamaguchi. La inauguración ta prevista pa les 19 hores del miércoles y nella van tar presentes, amás de los dos ganadores, Joaquín Arce, direutor xeneral de Política Forestal, y Miguel Carrera, coordinador de Nartur.