El mundu de los tratantes de ganáu nel etnográficu de Porrúa

Dende esti domingu 1 de xunetu pue visitase en Porrúa (Llanes) nes instalaciones del Muséu Etnográficu del Oriente d'Asturies la exposición "tratantes Una especie n'estinción" que s'acompaña del llibru del mesmu títulu, nel que l'autor americanu asitiáu n'Asturies Mark Ostrowsky andechó col escritor asturianu Xuan Bello pa facer los testos.

La esposición presenta un total de treinta y cinco semeyes sobre tratantes de ganáu asturianos feches nos últimos años por Mark Ostrowski (1972), fotógrafu, escritor, traductor y rellacionáu en cierta midida col oficiu pola so condición de criador d'oveyes. Les imáxenes acompáñense nel llibru de dos testos, ún del mesmu Ostrowsky y otru del escritor Xuan Bello, qu'arriquez les semeyes con histories y testimonios de los mesmos tratantes.