El mundu de la cultura sufre la perda de Lobato y de Vitorino García

L'actor de Soto Rei y el cunqueiru de Trabáu muerren a edaes tempranes: 64 y 57 años.

Estos díes el mundu de la cultura sufrió dos perdes importantes. Finaron José Antonio Lobato y Vitorino García González, el primeru tres una enfermedá y el de Degaña de sópitu.

La muerte de l'actor tuvo llugar esta madrugada n'Uviéu. Fundador de Teatro Margen nel 1977 xunto con otros compañeros pa desendolcar un teatru profesional nel país, tuvo ésitu tamién a nivel estatal, participando en númberoses obres, en películes con repercusión y en series de televisión d'audiencies tan importantes como 'El Ministerio del Tiempo'.

Lobato foi una persona comprometida dende la so profesión y na so vida diaria cola llingua asturiana. Xunto con Sonia Fidalgo, punxo la so voz na llectura del manifiestu de la Xunta pola Defensa de la Llingua Asturiana (XDLA) na manifestación del añu pasáu en Xixón pa reclamar la oficialidá del asturianu.

Tamién tuvo un importante compromisu col idioma de la so tierra, García González 'El Cunqueiro', del que'l sábadu conocíase la so perda. Divulgador d'un oficiu a piques del desaniciu, yera una persona bien conocida en Degaña y en tola rexón suroccidental del país pol so llabor y defensa de la cultura tradicional y el mundu rural.