El movimientu de reivindicación llingüística llora la perda de Xuan el de la Xunta

Dexónos el domingu a los 46 años.

Na mañana d'ayeri corría per Xixón de boca en boca la noticia de la mui temprana marcha de Xuan González González. Un momentu de tristura tanto pa la xente cercano a él como de los que nun tuvieron tratu con esti trabayador del sector industrial y destacáu militante de la Xunta pola Defensa de la Llingua Asturiana (XDLA), una d'eses persones que fai esi llabor que queda munches vegaes na solombra, tan necesariu pa la bona marcha d'una organización.

Pertenecía al grupu d'El Natahoyo qu'entró na XDLA na segunda metá de la década de los 90 y foi ún de los fundadores de Xunta Moza en Xixón. El coleutivu amosaba en redes sociales el so sentir llueu de conocer la inesperada anuncia: "Los tos compañeros y compañeres de la Xunta, y seguro que tola xente que pasó pela organización, tenémoste na nuestra alcordanza".

"Les organizaciones sociales constrúyense cola ayuda desinteresada de la xente, col trabayu militante. La Xunta pola Defensa de la Llingua Asturiana ye'l resultáu de munches persones que nun momentu de la so vida quixeron echar un gabitu pa llevantar una organización ciudadana que nun se casare con naide y que punxere la defensa del futuru del idioma per delantre de cualquier otra consideración. Xuan, dende Xixón, foi una d'eses persones. Depués d'unos años de miltancia intensa, el so trabayu n'Arcelor quitó-y tiempu, pero siempre volvíemos venos cuando precisábemos manes pa garrar una pancarta nuna manifestación o pa trabayar nel chigre nun conciertu pola oficialidá. Siempre sabíemos que diba tar Xuan", espresaba.

Nes movilizaciones de la Naval

Aparte del so compromisu pola llingua asturiana, tamién foi una persona activa na defensa de los derechos llaborales. Militante de la Corriente Sindical d'Izquierda (CSI), participó nes movilizaciones de Naval Xixón nos años 90, onde trabayaba como eventual.

Esta tarde, a les 17 hores, va tener llugar la so despidida nun actu nel salón del tanatoriu de Cabueñes. Depués va recibir sepultura nel cementeriu de Ciares.

L'equipu que facemos Asturies.com aprovechamos estes llinies pa treslladar el nuesu pésame a familiares y collacios pola perda de Xuan.

Semeya de Xuan de la XDLA.