El modelu d'EBAU va caltenese esti cursu

El Gobiernu d'Asturies celebra la decisión del Ministeriu d'Educación y Formación Profesional porque da "certidume y tranquilidá a alumnos y profesores".

El modelu nuevu de la Evaluación de Bachilleratu pal Accesu a la Universidá (EBAU) nun va entrar hasta'l cursu 2024-2025 al haber duldes sobre si l'Executivu en funciones pudiera aprobar'l real decretu necesariu p'aplicar el cambiu que marca la LOMLOE, previstu pal 2023-2024. L'aconceyamientu de la Comisión Xeneral d'Educación d'esta mañana decidió nun dar esti pasu, resolución que se comunicó darréu a les comunidaes autónomes nuna xunta informativa.

"Ye una posición que dende'l Principáu d'Asturies queremos agradecer al ministeriu yá que supón un exerciciu de responsabilidá y prudencia pol momentu actual nel que tamos, con un Gobiernu en funciones. Amás, ye una estensión de l'apertura y busca de consensu que siempre imperó nes propuestes del ministeriu", espuso David Artime, direutor xeneral d'Inclusión Educativa y Ordenación, que representó a Asturies nel conceyu telemáticu.

L'Executivu asturianu entiende qu'esta decisión "da certidume y tranquilidá a alumnos y profesores y permite seguir trabayando nos grupos téunicos que se crearon". En rellación al modelu, defende "la llinia actual de trabayu sobre la EBAU, una EBAU por competencies y adaptada a comunidá, en tanto que cada comunidá autonóma tenemos el nuesu propiu currículu".

Na semeya, Artime participa na xunta informativa telemática d'esta mañana.