El moñecu de Michelín, protagonista d'una esposición

El famosu moñecu de la firma de neumáticos Michelín ye'l protagonista de l'amuesa gráfica Nunc est Bibendum, entamada pola Fundación Michelín en collaboración cola Conceyalía de Cultura del Conceyu d'Avilés, onde llegó tres de pasar per bien de museos dende qu'entamó la esposición nel MUVIM de Valencia.

Esta esposición revive, siguiendo les pautes cronolóxiques y les evoluciones gráfiques, el devenir iconográficu de "Bibendum" la imaxe y marca de la empresa de neumáticos Michelín. Bibendum nació pola iniciativa de los empresarios André y Édouard Michelin en xunto col dibuxante O'Galop, alcuñu de Marius Rosillon, un artista que dibuxaba davezu pa les revistes humorístiques del París d'últimos del XIX. La inspiración pa crear a Bibendum viéno-yos gracies a un montonáu de cubiertes que teníen delantre d'ellos. El fechu de que sía blancu, cuando les ruedes son prietes por definición, vien de que d'aquella les cubiertes yeren mui delicaes y tapábense con papel blanco.

Un cientu d'obres ente carteles, figures tridimensionales, trabayos destinaos a la prensa y guíes d'automovilistes espeyen dende finales del sieglu XIX hasta güei la historia d'esta figura que ye la imaxe publicitaria más conocida en mundu. El mesmu O'Galop, Roger Broders, René Vincent, Georges Bourdin, A. Renault, Albert Philibert y Raymond Savignac, y tamién d'otros diseñadores publicitarios de Michelín menos conocíos pero de gran trescendencia en cada momentu históricu son los autores al traviés de los que s'espeya la evolución de Bibendum, que tamién camudó muncho no iconográfico amás de no formal, pasando de ser de mano un aristócrata espurríu que fumaba puros y gastaba sombreru altu a ser un forzudu qu'ayudaba na carretera a los automovilistes potenciando la imaxe políticamente correcha del "amigu del automovilista".

La muestra va tar abierta del 9 de xineru al 10 de febreru nel Centru Municipal d'Arte y Esposiciones (Llano Ponte, 49) de llunes a sábadu de 11,00 a 13,00 y de 18,00 a 21,00 hores nun siendo festivu.