“El mio trabayu nuevu, ‘Remanecer’, va buscando los oríxenes del celtismu”, esplica Bras Rodrigo

El gaiteru Bras Rodrigo tien previsto a asoleyar a últimos d’abril, si la pandemia de COVID-19 nun lo retrasa a mayu, el so discu nuevu ‘Remanecer’, onde busca “los oríxenes del celtismu”. El de Perlora fálanos nun videu p’Asturies.com d'esti álbum y de la so gaita led.

El 17 de marzu, San Patriciu, Rodrigo espublizó un videoclip nuevu, de nome tamién ‘Remanecer’, títulu del cantar y del album “que yá taba pensáu en payares”. “Nun tengo nenguna bola de cristal”, bromia, anque reconoz que “ye un títulu afayadizu pa estos tiempos que nos tocando vivir”.

Trátase del cuartu trabayu del gaiteru tres ‘Xermandía’ (2005) y 'A pause in New York’ (2016) –que tuvo una reedición l’añu pasáu qu’incorpora’l tema ‘Lug’ y ‘Naquel malecón’ en gallegu versionáu pola orquesta Panamá Band–, xunto al navidiegu 'Christmas pipes' (2017). Rodrigo fálanos nesti videu de los detalles de ‘Remanecer y de la so novedosa gaita led, gaita asturiana con una innovación estética que ta llamando muncho l’atención fuera d'Asturies y a la xente ayena a la música tradicional.