El Ministeriu de Tresportes nun usa la toponimia oficial (y el conseyeru tampoco)

El Conseyu de Ministros autoriza a llicitar al traviés d'Adif la modernización de la señalización de trés tramos de la rede ferroviaria asturiana.

El Ministeriu de Tresportes y Movilidá Sostenible fixo ayeri una anuncia del próximu destín de 65 millones d'euros pa modernizar los tramos Uviéu-L'Infiestu, Xixón-El Berrón y Ribadeo-Cuideiru. Pa ello emplegó topónimos derogaos, tapeciendo los nomes de llugar tradicionales, únicos oficiales.

El mensaxe espublizáu na rede social X foi esta mañana citáu pol conseyeru de Fomentu, Cooperación Llocal y Prevención de Quemes, Alejandro Calvo, qu'ayeri atendiera una quexa d'Iniciativa pol Asturianu pola desapaición de cartelos n'asturianu en carreteres de titularidá autonómica en Llangréu y Mieres. La so postura, magar el so mensaxe llanzáu hores enantes pol cumplimientu de la toponimia oficial, foi la d'emplegar tamién formes derogaes.

Avanza el Plan de Cercanías de Asturias: 65 millones para modernizar los tramos Oviedo-Infiesto, Gijón-El Berrón y Ribadeo-Cudillero que se suman a los ya activados en Gijón-Pravia, Trubia-Collanzo, Trubia-Oviedo y Cudillero-Pravia https://t.co/6exhw8zXjI

— Alejandro Calvo (@AlejandroJCalvo) April 3, 2024

Nos trés contratos que se van llicitar implementaránse elementos nuevos de señalización cola fin de xestionar la so circulación en remotu, integrándola nel sistema de control de tráficu centralizáu (CTC) y reforciando asina la fiabilidá del serviciu al traviés del ameyoramientu de la infraestructura, aumentando la capacidad de la rede y regularidá de los servicios. Les operaciones consistirán na instalación y puesta en servicio de los enclavamientos (dispositivos que xestionen les señales d'un tramu), los sistemas de deteición y proteición del tren, señales fixes y lluminoses, telecomunicaciones fixes y otres dotaciones asociaes.

Dientro del Plan de Cercaníes, destinaránse pa estos llabores 29,4 millones de euros pal Uviéu-L'Infiestu y 18 pal Xixón-El Berrón. Mentes, fuera de dichu plan, el Ribadeo-Cuideiru recibirá 17,4 millones.

Na imaxe, apeaderu de Los Corros, nel tramu Uviéu-L'Infiestu. Semeya propiedá del Ministeriu de Tresportes y Movilidá Sostenible.