El Ministeriu de pesca estudia pa diversificar los caladeros asturianos

El Ministeriu de Pesca y Agricultura presentó esta selmana en Puertu d'El Musel el buque "Vizconde de Eza" un barcu especial que tuvo esti mes n'Asturies faciendo una campaña nel caladeru d'El Cacuchu, enfrente de Ribeseya, la campaña "Ecomarg 2003" de la que los sos responsables científicos de la campaña nun quixeron adelantar datos en cuantes que tola información que recoyeron na campaña ta entovía ensin procesar, pero sí que detallaron los oxetivos de la mesma. El llabor del "Vizconde de Eza" pretende en primer llugar facer un estudiu morfo-sedimentariu del caladeru, editando una completa cartografía del mesmu y caracterizar la comunidá que vive nelli.

Más rellacionaos cola actividá pesquera tan otros de los llabores de la campaña, como son per un llau la evaluación del estáu de les poblaciones de les especies que más se pesquen y per otru, investigar n'otres especies qu'hasta agora nun foron oxetu d'esplotación comercial, ellaborando finalmente una propuesta d'usos sostenibles del caladeru que valga de documentu marcu pal desenrollu del llabor pesqueru.

Ente los oxetivos de la campaña, como reconoció Francisco Sánchez Delgado, responsable de la Ecomarg, pasen per desviar l'interés de la industria pesquera a otres especies en que nun posare la vista hasta agora en cuenta d'aquelles que lleven años sofriendo una sobreesplotación que ta dexando les sos poblaciones en niveles preocupantes.

La crisis por sobreesplotación nos caladeros asturianos vien de vieyo y agravóse estos años últimos, en que la baxada del volume de les captures, obligó a acutar paros bilóxicos especiales, casu de la campaña del bocarte nel 2001 o del de la merluza nel 2002. Amás del volume total de pesca, mengua tamién el tamañu del pexe, sobremanera ente les especies más grandes, casu del cóngaru. Lo que nun baxa de momentu ye'l preciu nes rules, lo qu'ayuda a caltener a un sector en crisis del que dependen n'Asturies cerca de 2.000 puestos de trabayu. El llabor del "Vizconde de Eza" pretende diversificar la esplotación pesquera y atopar nichos nuevos de negociu. En tres meses sabranse los resultaos de la so campaña.