El Ministeriu de Mediu Ambiente asitia’l centru d’Asturies como un “puntu negru” de contaminación

La mayor parte del millón d'habitantes d'Asturies inxértense ente los doce millones de ciudadanos españoles que respiren aire aire contaminao, acordies con un informe que-y unvió'l Ministeriu de Mediu Ambiente a la Unión Europea. L'informe asitia a Xixón y el centru d'Asturies como llugares onde se concentra'l mayor volume de focos contaminantes. En cuasimente tol centru d'Asturies conséñense nel informe valores de partícules en suspensión penriba de lo que s'encamienta y nel casu de Xixón la concentración perpasa amás los topes llegales de dióxidu d'azufre.

El centru d'Asturies asítiase asina ente los 25 llugares más contaminaos d'España nun momentu en que les directives comunitaries endurecen los topes de contaminación que se consienten. Organizaciones ecoloxistes como la Coordinadora Ecoloxista d'Asturies o Ecoloxistes n'Acción lleven tol añu alvirtiendo qu'Asturies taba penriba de los nuevos máximos llegales, centrando la so crítica nes centrales térmiques. Un estudiu d'Ecoloxistes n'Acción alvertía como nel añu 2004 la Térmica d'Aboño, en Xixón, perpasó más de trés vegaes el tope consentíu d'emisiones de dióxidu d'azufre y 35 el de partícules, siendo la térmica que más azufre vertió a l'atmósfera de toa Asturies, mientres que na térmica de La Ribera asocedió otru tanto coles partícules. La térmica de Lada (Llangréu) tamién pasó con muncho los topes de dióxidu d'azufre, y la de Soutu la Barca en Tinéu, yá nel occidente asturianu, perpasó los topes consentíos de partícules.

Acordies colos datos de la Unión Europea, más de 16.000 persones muerren tolos años nel Estáu Español por problemes arreyaos a los efectos de la contaminación na salú, sobremanera nel aparatu respiratoriu. 12 millones de ciudadanos nel estáu tan espuestos a niveles de contaminación penriba de los topes llegales, ente ellos, los cerca de 800.000 asturianos que viven nel centru del país. Grandes ciudaes como Madrid, Málaga Sevilla, Barcelona, Bilbao y Córdoba tan amás del centru d'Asturies ente los puntos negros del mediu ambiente español, pero tamién llugares menos poblaos pero que tienen infraestructures industriales altamente contaminantes. Ente elles, y namás en pasando la cordal, el norte de Lleón en tolo que ye la contornada de la térmica de La Robla.